ASCO Beynəlxalq Dənizçi Qadınlar Günü münasibətilə dəniz nəqliyyatı sahəsində çalışan xanımları bir araya gətirib - VİDEO+FOTOLAR

18 May – Beynəlxalq Dənizçi Qadınlar Günü münasibətilə AZCON Holding şirkətlərindən olan “Azərbaycan Xəzər Dəniz Gəmiçiliyi” QSC-nin (ASCO) “Suraxanı” gəmi-muzeyində tədbir təşkil olunub.

Tədbirdə ASCO-da çalışan xanımlarla yanaşı, dəniz nəqliyyatı sahəsində fəaliyyət göstərən dövlət qurumlarının, beynəlxalq təşkilatların Azərbaycandakı nümayəndəliklərinin, tərəfdaş gəmiçilik şirkətlərinin, dənizçilik təhsili müəssisələrinin xanım əməkdaşları da iştirak ediblər.

Tədbir çərçivəsində iştirakçılar əvvəlcə gəminin göyərtəsindən “Xəzər” Yelkənli Qayıqlar İdman Klubunun yelkənçilərinin dənizdə keçidini izləyiblər.

Daha sonra dənizçi xanımlar üçün muzeyin ekspozisiya zallarına tur təşkil edilib. İştirakçılar Azərbaycan gəmiçiliyinin tarixi, eləcə də zəngin dənizçilik irsimizi əks etdirən eksponatlarla yaxından tanış olublar.

Tədbir çərçivəsində Azərbaycanın ilk qadın gəmi kapitanı Şövkət Səlimovanın şəxsi ailə arxivinə aid nadir fotolar nümayiş etdirilib.

Görüş səhər yeməyi süfrəsi arxasında səmimi müzakirələrlə davam edib, həmçinin qonaqlar müxtəlif əyləncəli müsabiqələrin iştirakçısı olublar. 

Qeyd edək ki, Beynəlxalq Dəniz Təşkilatının (IMO) təşəbbüsü ilə 2021-ci ildə təsis edilən 18 May – Beynəlxalq Dənizçi Qadınlar Günü dənizçilik sahəsində çalışan qadınların rolunun təşviqi, gender bərabərliyinin dəstəklənməsi və onların dəniz sənayesində iştirakının artırılması məqsədi daşıyır. Azərbaycan da IMO-nun üzv dövləti olaraq bu istiqamətdə beynəlxalq təşəbbüsləri dəstəkləyir və dənizçilik sahəsində qadınların iştirakının artırılmasına xüsusi önəm verir.

Gallery